ሉሲዎቹ ዝግጅታቸውን አጠናክረው ቀጥለዋል።

የኢትዮጵያ ሴቶች ብሔራዊ እግር ኳስ ቡድን ከዩጋንዳ አቻው ጋር ላለበት የአፍሪካ ዋንጫ ማጣሪያ ውድድር ቅድመ ዝግጅት በአሰልጣኝ ብርሃኑ ግዛው መሪነት  ለ34 ተጫዋቾች ጥሪ በማድረግ ከመስከረም 14 ቀን 2014 ዓ.ም ጀምሮ ሀያት አካባቢ በሚገኘው የካፍ የልዕቀት ማዕከል ዝግጅቱን  አጠናክሮ ቀጥሏል።

ቡድኑ ዝግጅቱን በቀን ሁለት ጊዜ በመስራት ላይ ሲሆን ጥሪ ከተደረገላቸው 34 የቡድኑ አባላት 9 ተጫዋቾችን በተለያዩ ምክንያቶች በመቀነስ እና ከ20 ዓመት በታች ብሔራዊ ቡድን ሲጫወቱ የቆዩትን በማካተት በአጠቃላይ  25 ተጫዋቾችን በመያዝ ዝግጅቱን እያደረገ ይገኛል።

የሉሲዎቹን ዝግጅት አስመልክቶ ዋና አሠልጣኝ ብርሃኑ ግዛው በሰጡት አሰተያየት “ዛሬ ጥቅምት 2/2014 በምናደርገው ኘሮግራም በቀን ሁለት ጊዜ ስናደርግ የቆየነውን የስካሁኑን ልምምድ በማጠናቅ በቀጣዮቹ ቀናት በቀን አንድ ጊዜ እንሰራለን ። ከእዚሁጋር ተያይዞ ልምምዶቻችንን ለመፈተሸ ቀደም ሲል ከ16 እና ከ17 ዓመት በታች ወንዶች ብሔራዊ ቡድኖች ጋር የአቋም መለኪያ ጨዋታዎችን አድርገናል።

በተጨማሪም ነገ ጥቅምት 3/2014 ቀደም ሲል ወደ ቻይና ተጉዞ ተጫውቶ ከነበረው ከ16 ዓመት በታች ወንዶች ብሔራዊ ቡድን ጋር ከቀኑ በ10:00 ሰዓት 3ኛውን የአቋም መለኪያ ጨዋታ በካፍ አካዳሚ  የምናደርግ ይሆናል። ” በማለት ገልፀዋል።