“መቶ ፐርሰንት ለሻምፒዮናነት የሚጫወት ቡድን ነው ያለን” በሀዲያ ሆሳህና ላይ ያስመዘገብ ነው የድል ውጤት እንደ ሶስት ብቻ ሳይሆን እንደ ስድስት ነጥብ ነው የምንቆጥረው” አህመድ ረሺድ /ሺሪላ/ (ባህርዳር ከነማ)

የቤትኪንግ ፕሪምየር ሊጉን ጅማሬ በመቶ ፐርሰንት ሪከርድ እየመሩ ካሉ ክለቦች መካከል ለሚጠቀሰው ባህርዳር ከተማ በግራ መስመር /ፉል ባክ/ በጥሩ ብቃቱ የሚጫወተው አህመድ ረሺድ /ሺሪላ/ በዘንድሮ የውድድር ዘመን ተሳትፎው በሊጉ መቶ ፐርሰንት ለሻምፒዮናነት የሚጫወት ቡድን እንዳላቸውና ይህንን የአሸናፊነት እልማቸውንም እንደሚያሳኩት ለሊግ ስፖርት ጋዜጣ አስተያየቱን ሰጥቷል፡፡

ባህርዳር ከተማ በቤትኪንግ ፕሪምየር ሊጉ እስካሁን አዲስ አበባ ከተማን 3-0 እና ሀዲያ ሆሳህናን በመጨረሻዋ ደቂቃ ላይ ማውሊ አሊ ባስቆጠረው ግብ 1-0 ማሸነፉን ተከትሎ ውድድሩን በ6 ነጥብና በ4 ንፁህ ግብ ክፍያ በመምራት ላይ ሲሆን ይህንን የአሸናፊነት መንፈስም በቀጣዮቹ ጨዋታዎችም ላይ እንደሚያስቀጥሉት አህመድ ረሺድ ከጋዜጠኛ መሸሻ ወልዴ /G.BOYS/ ጋር በነበረው ቆይታ ገልጿል፡፡

ባህርዳር ከተማን በተመለከተ ሊግ ስፖርት በቤትኪንግ ፕሪምየር ሊጉ የጨዋታ ተሳትፎአቸው  ዙሪያ እና ሌሎችንም ጥያቄዎች አንስተን ከአህመድ ረሺድ ጋር ያደረግነው ቆይታ የሚከተለውን ይመስላል፡፡

በቤትኪንግ ፕሪምየር ሊጉ ስላላቸው የውድድር ጅማሬ

“እስካሁን ሁለት ጨዋታዎችን ለማድረግ ችለን ጥሩ ለመንቀሳቀስና ጨዋታዎቹንም ለማሸነፍ ችለናል፤ ሊጉን በመቶ ፐርሰንት ሪከርድ ከሚመሩት ሶስት ክለቦች አንዱም ሆነናል፤ ይህንን ውጤት ለማስመዝገብ እንድንችልም በአዲስ አበባ ሲቲ ካፕ ላይ የነበረንን የውድድር ተሳትፎ በአሸናፊነት ለማጠናቀቅ መቻላችንም በእኛ ላይ የፈጠረልን ከፍተኛ መነቃቃት ነበርና ይሄ ነው ከጅማሬው እኛን ለውጤታማነት እያበቃን የመጣው”፡፡

በአሸናፊነት መንፈሳቸው ይቀጥሉ እንደሆነና የዘንድሮ እቅዳቸው…

“የእኛ የዘንድሮው የውድድር ዘመን ዋንኛው ህልምና እቅዳችን አንድና አንድ ሊጉን በሻምፒዮናነት ማጠናቀቅ መቻል ነው፤ ለዛም ውጤታማነት የሚያስችል ጠንካራ ቡድንም አለን፤ በቀጣዮቹ ጨዋታዎቻችን ላይም አሁን የያዝነውን የአሸናፊነት መንፈስ እስከመጨረሻዎቹ ጨዋታዎች ድረስም እናስቀጥላለን፡፡ ይህንን ስልም ዝም ብዬ ከመሬት ተነስቼ አይደለም፤ ባህርዳር ከተማ አሁን ላይ በጣም ጠንካራ ቡድንና ጥሩ አሰልጣኝ አለው፤ እኛ ተጨዋቾቹም የአሰልጣኛችንን ኢንስትራክተር አብርሃም መብራቱን ልምምድ በብቃት ሰርተን ጥሩ ጨዋታን ከማሳየት ባሻገር ውጤታማም እየሆንን ነውና ይሄ ጉዞአችን ይበል የሚያሰኝም ነው”::

ሀዲያ ሆሳህናን ለማሸነፍ ስለጠበቁት የመጨረሻዋ ደቂቃ ጎል

“በሁለታችን ቡድኖች መካከል የተደረገው ይሄ ፍልሚያ ለመሸናነፍ ከፍተኛ ፉክክር የተደረገበት፣ እልህ አስጨራሽ ጨዋታ የታየበትና ጥሩም የኳስ ፍሰት የተመለከትንበት ነበር፤ ከዛም ውጪ አግሬሲቭ አጨዋወትም ነበረው፤ ያም ሆኖ ግን የእለቱን ጨዋታ እኛ ይበልጥ ለማሸነፍ ተሽለን ታይተን ነበርና በመጨረሻዋ ደቂቃ ላይ ያገኘናት ግብ ጣፋጭ ስለሆነች ነጥቧን እንደ ሶስት ሳይሆን እንደ ስድስት በመቁጠርም ግጥሚያውን ለማሸነፍ ችለናል፤  ድሉም ይገባናል”::

ሀዲያ ሆሳዕናን ያሸነፋችሁበት የመጨረሻዋ ደቂቃ የድል ግብ እናንተን በተመሳሳይ  መልኩ አምና ተቆጥሮባችሁ ውጤት አሳጥቷችሁ ነበር፤ በእዚህ ዙሪያ ምን አልክ…

“ይህ ግጥምጥሞሽ እኛንም በጣም አስገርሞን ነበር፤ አምና እነሱ በመጨረሻዋ ደቂቃ ላይ ባስቆጠሩት ግብ ነጥብ ሲያስጥሉን በጣም አዝነንና ተቆጭተን ነበር፤ አሁን ደግሞ ተራው የእኛ ሆነና በተመሳሳይ ሰዓት የድል ግብን በማስቆጠር የጨዋታው አሸናፊ ልንሆን ችለናል፤ የልፋታችንን ውጤት ልናገኝም ችለናልና ደስታችን ልዩ ነበር”::

በቤትኪንግ ፕሪምየር ሊግ ጅማሬያቸው ስላላቸው ጠንካራና ክፍተት ጎን

“ባህርዳር ከተማን ባለፉት ሁለት ጨዋታዎቹ በሜዳ ላይ እንደተመለከትኩት ያለን ጥንካሬ አስራ አንዳችንም ተጨዋቾች እንደ አንድ ሆነን መጫወታችን መቻል ነው፤ ማንም ገባ ኳሱን በጋራ እንደ ህብረት ስለተጫወትንም ነው ውጤታማ የሆነው፤ ተቀይረው የሚገቡትም ልጆች ጥሩ ብቃት አላቸው፤ እንደ ቡድን እንጂ እንደ ግል የሚጫወት ተጨዋች እኛ ጋር አለመኖሩም ጠቅሞናል፤ በክፍተት ደረጃ የተመለከትኩት ነገር ደግሞ ብዙም የለም፤ ምንአልባት ልጠቅሰው ከቻልኩ በማሸነፍ ውስጥ አልፎአልፎ ጥቃቅን ስህተት አለና እሱንም በቀጣዎቹ ጨዋታዎች ላይ አርመን ነው ወደ ሜዳ የምንመጣው”::

ጥቃቅን ስህተታችሁ ምን ይሆን…..

“ብዙም ባይሆንም አንድ አንዴ ስናጠቃ እንደ ቡድን የማንሄድበት ሁኔታ አለ፤ በቀጣዮቹ ጨዋታዎች ያን አስተካክለን ነው የምንመጣው”፡፡

ባህርዳር ከተማ ላይ ዘንድሮ ለውጥን ተመልክተሀል….

“አዎን፤ ለውጥማ አለ፤ አምና በፋሲል ተካልኝ ስንሰለጥን ጠንካራ ቡድን ነበረን፤ ዘንድሮ ደግሞ በኢንስትራክተር አብርሀም መብራቱ ስንመራ ከወዲሁ ጥሩ ጨዋታን ከውጤት ጋር በማጣመር እያስመዘገብን ይገኛልና ይህን በተጠናከረ መልኩ ልንቀጥልበትም ተዘጋጅተናል”::

ወልቂጤ ከተማን ስለሚፋለሙበት ቀጣይ ጨዋታ

“ከዚህ ጨዋታ በኋላ ፕሪምየር ሊጉ ይቋረጣል ተብሎ እየተነገረን ስለሆነ እኛ ይህንን ግጥሚያ አሸንፈንና መሪነታችንንም አስጠብቀን ነው ለመገኘት የምንፈልገው፤ ስለዚህም ቡድናችን አሁን ላይ ጥሩ የኳስ ችሎታ ያላቸውን ልጆች ስለያዘና የአሰልጣኛችንም ታክቲክ በማጥቃት ላይ ያተኮረም ስለሆነ ከወልቂጤ ከተማ ጋር የሚኖረንን ጨዋታ በሌላ ቡድኖች ላይ የነበረንን የኳስ የበላይነት አሁንም አጠንክረንበት በመጓዝ ግጥሚያውን አሸናፊ ሆነን እንወጣበታለን”::

ለባህርዳር ከተማ እንደ ግል ዘንድሮ ምን ግልጋሎትን ልትሰጠው ዝግጁ ሆነሀል….

“በእግር ኳስ ህይወቴ ሁሌም ቢሆን ለምጫወትባቸው ክለቦች አቅሜን ሳልሰስት ጥሩ ግልጋሎትን መስጠት ከእኔ የሚጠበቅ ግዴታ ስለሆነም በዛ መልኩ ነው ዘንድሮም በደንብ ተዘጋጅቼ ወደ ውድድር ውስጥ የገባሁት፤ ያም በመሆኑ ከአሰልጣኜ የሚሰጠኝን ልምምድ በአግባቡ ተከታትዬ በመስራት ክለቤን ከጓደኞቼ ጋር ለውጤት ለማብቃት እፈልጋለው”፡፡

በመጨረሻ….

“ሀገራችንን ዓላ ይጠብቅልን፤ ቤትኪንግ ፕሪምየር ሊጉም በተሳካ ሁኔታ እንዲጠናቀቅ ምኞቴም ነው፤ ከዛ ውጪ ማለት የምፈልገው ለክለቤ ባህርዳር ከተማ ዘንድሮ ጥሩ የውጤት ጊዜ እንዲሆነውና ደጋፊዎቻችንም ደስታን እንዲያጣጥሙ ፈጣሪ ይርዳንም ነው የምለው”፡፡