በቤትኪንግ የኢትዮጵያ ፕሪሚየር ሊግ 2015 23ኛ ሳምንት ያልፀደቀ ውጤትና የዲሲፕሊን ውሳኔዎቹ ይፋ ሆነዋል።
የኢትዮጵያ ፕሪሚየር ሊግ ውድድር አመራርና ስነ-ስርዓት ኮሚቴ እሁድ ሚያዝያ 29 2015 ዓ.ም ባደረገው ስብሰባ የተደረጉ የኢትዮጵያ ፕሪሚየር ሊግ ግጥሚያ(ዎች)ከዳኞች እና ከታዛቢዎች የቀረቡለትን የዲሲፕሊን ሪፖርት ከመረመረ በኋላ የተለያዩ ውሳኔዎችን ማስተላለፉ ይታወቃል። በወቅቱ በፕሪምየር ሊጉ አ.ማ. የተቋቋመው ቴክኒካል ኮሚቴ የ23ኛ ሳምንት እግር ኳስ ጨዋታ አንዱ በሆነው የኢትዮጵያ መድንና ሲዳማ ቡና ግጥሚያ ዙሪያ ምርመራ እያደረገበት በመሆኑ የኮሚቴው የቅድመ ምርመራ ውጤት እስኪታወቅ ድረስ የጨዋታው ውጤት እንዳይጸድቅ እና ከጨዋታው ጋር የተያያዙ የዲሲፕሊን ውሳኔዎች እንዲታዩ የውድድርና ስነስርዓት ኮሚቴ ውሳኔ ማስተላለፉ ይታወቃል። በመሆኑም የውድድርና ስነስርዓት ኮሚቴ ክለቦቹ ቀጣይ ጨዋታዎችን ከመጫወታቸው ቀድም ብሎ ውጤት ፀድቋል እና የዲሲፐሊን ውሳኔዎችም ዛሬ ይፋ አድርጓል።
በተጫዋችና ቡድን አመራሮች ደረጃ በተላለፉ ውሳኔዎች ሁለት ተጫዋቾችና አንድ አሰልጣኝ ላይ ቅጣት ተላልፏል። ኪቲካ ጅማ(ኢትዮጵያ መድን) እና ሙሉቀን አዲሱ(ሲዳማ ቡና) ሁለተኛ ቢጫ ካርድ የሚያስጥ ጥፋት በመፈፀማቸው ቀይ ካርድ አይተው ከጨዋታ ሜዳ የተወገዱ ለፈፀሙት ጥፋት በኢ.እ.ፌ ዲሲፕሊን መመሪያ መሰረት 1 ጨዋታ እንዲታገዱ እንዲሁም ገብረመድኅን ኃይሌ(ኢትዮጵያ መድን – አሰልጣኝ) ክለባቸው ከ ሲዳማ ቡና ጋር ባደረገው ጨዋታ ዳኛን አፀያፊ ስድብ በመሳድብ ከጨዋታ ሜዳ የተወገዱ የቡድን አመራሩ ለፈፀሙት ጥፋት በኢትዮጵያ ፕሪምየር ሊግ የውድድር ደንብ የውድድር ደንብ መሰረት 3 ጨዋታ እንዲታገዱና በተጨማሪ የገንዘብ ቅጣት ብር 10000 /አስር ሺ/ እንዲከፍሉ ተወስኗል።
በተጨማሪም አሰልጣኝ ገብረመድህን ሀይሌ 23ኛ ሳምንት እግር ኳስ ጨዋታ ግጥሚያው ከተጠናቀቀ በኋላ ለሱፐር ስፖርት በሰጡት የድህረ ጨዋታ ቃለመጠይቅ ወቅት የዕለቱን የጨዋታ አመራሮች አሰራራቸውን ያለአግባብ የተቸና ስሜታቸውን የጎዳ አሰተያየት ስለመስጠታቸው ሪፖርት የቀረበባቸው በመሆኑ አሰልጣኙ ለፈፀሙት ጥፋት ከተላለፈባቸው ቅጣት በተጨማሪ በኢ.እ.ፌ ዲሲፕሊን መመሪያ መሰረት 3 /ሶስት ወር/ እዲታገዱና ተጨማሪ የገንዘብ ቅጣት ብር 10000 /አስር ሺህ/ እንዲከፍሉ ተወስኗል፡፡
በክለቦች ደረጃ በታዩ ሪፖርቶችም ኢትዮጵያ መድን በሳምንቱ ጨዋታ የክለቡ ከአራት በላይ ተጫዋቾች በተለያዩ ጥፋቶች ካርድ የተሰጣቸው በመሆኑ በኢ.እ.ፌ ዲሲፕሊን መመሪያ መሰረት ክለቡ የገንዘብ ቅጣት ብር 5000 /አምስት ሺ/ እንዲከፍል ተወስኗል፡፡
