የቡናማዎቹ የጨዋታ አቀጣጣይ ነው…. ፕሮፌሽናል የመሆን ፍላጎታችን የቀነሰው መንገዱ ከባድ እንደሆነ ነግረውን ነው እኔጋ ግን ፍርሃት የለም ሀገሬን ለአፍሪካና ለዓለም ዋንጫ ማሳለፍ ከዚያም ፕሮፌሽናል ሆኜ ከሀገር ውጪ መውጣት ዋነኛ ህልሜ ነው ሲል ይናገራል…በጥሎማለፉ የዋንጫ ጨዋታ የጨዋታው ኮከብ የተባለው እንግዳችን በጥሎማለፉ ድል የተሰማው ደስታ ልዩ መሆኑን ይናገራል… …. ከሊጉ ዮሴፍ ከፈለኝ ጋር ቆይታ ያደረገው ከኢትዮጵያ ቡና ጋር የነበረው ኮንትራት የተጠናቀቀው አብዱልከሪም ወርቁ ለቀረቡለት ጥያቄዎች የሚከተለውን ምላሽ ሰጥቷል…
ሊግ:- አመሰግናለሁ ለቃለምልልሱ ዕረፍቱ ምን ይመስላል..?
አብዱልከሪም:- አሁን ሙሉ በሙሉ ዕረፍት እያደረኩ ነው ከቤተሰብና ጓደኞቼ ጋር ጊዜ እየወሰድኩም ነው ጥሩ ጊዜ አግኝቻለሁ እግርኳስ ተጨዋች በመሆኔ ባለው የጊዜ እጥረት ከማህበራዊ ጉዳይ እርቃለሁ ችግር የሆነው እሱ ነው እንዲህ አጠር ያለ ጊዜ ነው የማገኘው … ቤተሰቦቼ በተለይ ደግሞ እናቴ በጉጉት ነው የምትጠብቀኝ ጥሩ ጊዜ ከእሷ ጋር እያሳለፍኩ ነው ጣፋጭ ጊዜዬ ነው …ቤተሰብም ጓደኞቼንም የማገኝበት ጊዜ ነው ሁሉም አሪፍ ነው/ሳቅ/
ሊግ:- ከኢትዮጵያ ቡና ጋር አመቱ እንዴት አለፈ.?
አብዱልከሪም:- እንደ አጠቃላይ ጥሩ ጊዜ ነበር ማለት ይቻላል …አመቱ ሲጀመር መጥፎ አጀማመር ቢሆንም በተለይ ከአሰልጣኝ ለውጥ በኋላ የተሻለ ጊዜ አሳልፈናል…ካለን አቅም አንጻር ከዚህ የተሻለ ማድረግ ነበረብን ብዬ አስባለሁ ፕሪሚየር ሊጉ ላይ ካለንበት የተሻለ መጓዝ ነበረብን ግን በጥቃቅን ስህተቶች ነጥቦችን መጣላችን ጎድቶናል ነገር ግን የጥሎማለፉ ድል ትልቅ መጽናኛችን ሆኗል።
ሊግ:- የጥሎማለፉ ዋንጫ ትልቁ ድልህ ነው…?
አብዱልከሪም:- እስከዛሬ ዋንጫ ያነሳሁት ሱፐር ሊግ ላይ ብቻ ነበር… በትልቁ ሊግ በፕሪሚየር ሊጉ ውድድርና ደረጃ ግን የመጀመሪያ ድሌ ነው ትልቅ ደስታ ፈጥሮልኛል በህይወቴ ትልቁ ታሪኬም ነው በዚህ ሁሉ የቡና ደጋፊ ፊት ነው ዋንጫውን ያነሳነው ይሄ ምርጥ ደጋፊ ደግሞ ከዚህ በላይ ድል ይገባዋል ብዬ አምናለሁ ሁሉ ነገሩን የሰጠበት ቡድኑ ነው ከፍ ያለ ዋንጫ ይገባዋል ድሉ ትልቁ ታሪኬ ነው ወደፊትም ለልጆቼ የምነግራቸው ታላቅ ታሪክ አሳክቻለሁ በዚያ ላይ የጨዋታው ኮከብ ሆኜ መጨረሴና መሸለሜ አስደስቶኛል።
ሊግ:- የዋንጫውን መታሰቢያነት ለማን ይሁንልህ..?
አብዱልከሪም:- ለመላው የኢትዮጵያ ቡና ደጋፊ ይሁንልኝ….በነሱ ደስተኛ ነኝ ድሉ ይገባቸዋል
ሊግ:- የጥሎማለፉ ድል መጽናኛ ነው አይመጥነንም ፕሪሚየር ሊጉ ነው የኛ ደረጃ የሚሉ ደጋፊዎች አሉ..አንተስ ምን ትላላለህ…?
አብዱልከሪም:- እንደኔ በጥሎማለፉ ድል ተደስቻለሁ ምንም ጥያቄ የለውም ግን እኛንም ደጋፊውንም ቡድኑንም በትክክል የሚመጥነው ፕሪሚየር ሊጉ ነው ነገር ግን በትናንሽ ስህተት ነው ነጥብ የጣልነው ዘንድሮ እንደውም እድሉ እንደነበረን ነው የሚሰማኝ …
የፕሪሚየር ሊግ ዋንጫውን በጥቃቅን ስህተትና በትንሽ ልምድ ማነስ አጥተነዋል። በአብዛኛው በወጣት የተሞላ ቡድን ነው የዋንጫ አዕምሮ ያለው ተጨዋችም መሃላችን አልነበረም … ያም ጎድቶናል
ሊግ:- ነጥብ ከጣላችሁበት ጨዋታ በይበልጥ ያበሳጨህ የትኛው ነው .?
አብዱልከሪም:- ያለጥርጥር በድሬዳዋ 2ለ1 የተሸነፍንበት ጨዋታ ከአዕምሮዬ አይወጣም አበሳጭቶኛል… በርካታ የግብ ማግባት ዕድሎችን አምክነን የተሸነፍነው ያ ጨዋታ ነው አመታችንን ያበላሸው … ከዚህ ጨዋታ በፊት የነበሩ 10 ተከታታይ ጨዋታዎችንኮ አልተሸነፍንም ነበር ከድሬዳዋ ሽንፈት በኋላ በተደጋጋሚ ነጥቦችን ጣልን ወዲያውኑ መመለስ ማገገም አልቻልንም መንሸራተቱ በዛ ምክንያቱ ልምድ ያለው የዋንጫ ሜንታሊቲ ያለው ተጨዋች በመሃላችን አለመኖሩ ያመጣው ይመስለኛል…ለዚህ ነው ለመነሳት የከበደን…
ሊግ:- እንደ ተጨዋች የትኛውን ቡድን መግጠም ደስ ይልሃል..?
አብዱልከሪም:- ከትልልቆቹ ቡድኖች የምናደርገውን ጨዋታ እወደዋለሁ በነጻነት ሁሉም አቅሙን የሚያሳይበት ነጻ ጨዋታ መጫወት የምንችልበት ይመስለኛል ትልልቆቹ ጋር መጫወት ደስ ይላል
ሊግ:- ለአንተ እነማን ናቸው ትልልቆቹ ክለቦች …?
አብዱልከሪም:- እነ ፋሲል ከነማ፣ ቅዱስ ጊዮርጊስ፣
ባህር ዳር ከተማ ….በአጠቃላይ ከላይ ሆነው የሚጨርሱትን ክለቦች ያጠቃልላል ዘንድሮ ደግሞ እነ ኢትዮጵያ ንግድ ባንክ መቻልን ያጠቃልላል … ከእነሱ ጋር ስጫወት ተነሳሽነቱ ይጨምራል ፍልሚያውን እወደዋለሁ አብዛኛውም ተጨዋች ይህን የሚያስብ ይመስለኛል
ሊግ:- ከተጋጣሚ ቡድን ያስቸገረህ ተጨዋች አለ ..?
አብዱልከሪም:- እንዲህ ነው ብዬ የምጠራው ተጨዋች የለም ግን ከትልልቅ ቡድን ጋር ስትጫወት ትልልቆቹን ተጨዋቾች ታገኛለህ ትልቅ ከሚባሉና ከተመሳሳይ ቦታ ጋር ከማገኛቸው ተጨዋቾች ጋር መፋለም ደስ ይለኛል
ሊግ :- ከኢትዮጵያ ቡና ተለያይተሃል …አዲሱ ክለብህ መቻል ሆኗል…. ሌሎች ክለቦችም እየፈለጉህ ነበር መቻልን ለምን መረጥካቸው..?
አብዱልከሪም:- የቡድኑ ስኳድ ጠንካራ መሆኑ ማርኮኛል … ስብስቡ ሙሉ ነው በዚያ ላይ ያቀረቡልኝ የቀጣይ ጊዜ እቅድ እንድመርጣቸው አድርጎኛል ..
በዚህም ደስተኛ ነኝ ዘንድሮ ከጫፍ ደርሰው ነው ዋንጫ ያጡት …በቀጣይ መቻል ዋንጫ የማንሳት ትልቅ እድል ያለው ቡድን ስለሆነ ምርጫዬ ሆኗል
ሊግ:- ከኢትዮጵያ ቡናና ጋር ያላስስማማህ ምክንያት ምንድነው የተጣራ 400 ሺህ ብር ደመወዝ እንዳቀረቡልህ መረጃው አለኝ..?
አብዱልከሪም:- ከገንዘቡ በላይ ስጋት የነበረኝ ውስጤ መቀበል ያቃተው የቡድኑ ተጨዋቾች እየለቀቁ መሆናቸው ነው እንደገና እንደ አዲስ የሚዋቀር ቡድን ነው የሆነብኝ…የመቻል ግን የተሰራ መሆኑ እንድመርጠው አድርጎኛል በዚህ ምክንያት መጀመሪያም ከቡና ጋር ተደራድሬ ስወጣም አልተስማማሁም ነበር። በዚህ አጋጣሚ መላውን የኢትዮጵያ ቡና ደጋፊዎችን ማመስገን እፈልጋለሁ .. በቆይታዬ ለሰጡኝ ፍቅር ላሳዩኝ አክብሮት ማመስገን እፈልጋለሁ ሁሌም በልቤ ውስጥ ይኖራሉ።
ሊግ:- አብዛኛው ተጨዋች ከባድ ልምምድ አይወድም ይባላል .. አንተስ ልምምድ ትወዳለህ ..?
አብዱልከሪም:- አሁን ለውጥ አለኝ ኳስ የጀመርኩኝ አካባቢ አይመቸኝም አልወድም ነበር ያም ብዙ ነገር አሳጥቶኛል የመጀመሪያ ፕሪሚየር ሊግን የተቀላቀልኩበት አካባቢ አይመቸኝም ነበር አሁን ግን ለውጥ አለኝ.. ከኮቪድ መቋረጥ በኋላ ጠንካራ ሰራተኛ ሆኛለሁ ብዬ አምናለሁ..
ሊግ:- በተለይ ከልምምድ በኋላ ዕረፍት ማለት ይገባሃል.. ለአንዳንዱ ተጨዋች መተኛት ሙሉ ሰውነትን ማሳረፍ ለሌላው ተጨዋች ከክፍሉ ሳይወጣ ካርታ ወይም ጌም መጫወት ነው ላንተስ ዕረፍትህን በትክክል ትጠቀማለህ..?
አብዱልከሪም:- /ሳቅ/ ዕረፍት ሲባል ብዙም አልጠቀምም ነበር ትክክለኛው እረፍት ግን አዕምሮንም ሰውነትንም ማሳረፍ የሚለው ነው ይሄ ነው እረፍት አሁን ግን በትክክል ነው የማርፈው ..የዕረፍት ጊዜ ብቻ ሳይሆን በቂ ክፍተት ሳገኝ ራሴን ለመለወጥ እንደገና ልምምዴን እሰራለሁ ዋናው ጠንክሮ መስራት ደግሞም በደንብ ማረፍ የግድ ነው….
ሊግ:- ሃይማኖትህ ለስነምግባርህ ጠቅሞሃል ማለት ይቻላል..?
አብዱልከሪም:- ሁሉም ተጨዋች ላይ ለስነምግባሩ ሃይማኖቱ ተጽዕኖ አለው ብዬ አምናለሁ
ሊግ:- ሁሉም ተጨዋች …? ከስነምግባር ውጪ ሆነው የሚተቹ ተጨዋቾችኮ አሉ… እንዴት ሁሉም ማለት ይቻላል..?
አብዱልከሪም:- በግሌ ሀይማኖቱ ብዙ ሰው ላይ ተጽዕኖ ይፈጥራል ብዬ አምናለሁ… በሀይማኖቴ ጠንካራ ነኝ ማለት ባልችልም ሀይማኖቱ የሚለለውን ለማድረግ በጣም እጥራለሁ ብዬ አምናለሁ ጾምን ብታይ የግዴታ ሲሆን አልፌውም አላውቅም ማክበር የግድ ነው… ጾም በእኛ ሀይማኖት እንደ ግዴታ ነው ያንን አከብራለሁ
ሊግ:- ዝምተኛ ነው አሉኝ …እንዳሉህ ነህ..?
አብዱልከሪም:- ማንኛውንም ሰው እስክግባባው ዝምተኛ ነኝ እውነት ነው.. ከተግባባሁ በኋላ ግን እጫወታለሁ በዝምታ አላስቸግርም.. በቅርብ የሚያውቀኝ ሳይሆን በርቀት የሚያቀኝ ነው ጭምት ነው የሚለው.. እኔ ግን ዝምተኛ ነኝ ብዬ አላስብም
ሊግ:- ከተጨዋቾች ላይ ባይኖር የምትለው ምንድነው .?
አብዱልከሪም:- እንደ ተጨዋች ያለውን ልናገር..ከውሳኔ በኋላ ዳኞችን መክበብ ቢቀር እመኛለሁ..ውሳኔን በጸጋ መቀበል የሚለው ነገር ቢከበር ደስ ይለኛል … ዳኛን ከወሰነ በኋላ ላንመልሰው አላስፈላጊ ድርጊት ውስጥ ባንገባ ደስ ይለኛል..
ሊግ:- አንተስ በዳኛ ውሳኔ ተናደህ አታውቅም..?
አብዱልከሪም:- አውቃለሁ እንጂ… አስተያየቴ እኔንም ያካትታል ምንም ነገር ላንለውጥ ለአላስፈላጊ ካርድ ከምንዳረግ የዳኛ ውሳኔን በጸጋ መቀበል ይመረጣል ባይ ነኝ
ሊግ:- ከብሄራዊ ቡድናችን አንጻር ዕቅድህ ምንድነው..?
አብዱልከሪም:- የሀገሬን ብሄራዊ ቡድን ማሊያ በተደጋጋሚ መልበስ ቦታዬን በቋሚነት ማስከበር የመጀመሪያ እቅዴ ነው…. ከዚያ ሀገሬን ለአፍሪካ ዋንጫ ከፍ ሲልም ለዓለም ዋንጫ ማሳለፍ እመኛለሁ… እኔ እንደ ተጨዋች የሀገሬን ማሊያ ለብሼ ሀገሬን መወከል ትልቁ ህልሜ ነው ይህን ለማሳካት ጠንክሬ እሰራለሁ.. እንደማሳካው ርግጠኛ ነኝ
ሊግ:- እንዲህ የሚያልም ተጨዋችኮ ብዙ የለንም..?
አብዱልከሪም:- አብዛኛው ተጨዋች ፕሮፌሽናል ሆኖ መጫወትን እንዳያልም ያደረገው መንገዱ ከባድና የማይቻል ተደርጎ መነገሩ ይመስለኛል.. ሳድግ ከባድና የማይቻል አድርጌ ነው ያሰብኩት.. አብዛኛውም እዚሁ ሀገር ተጫውቼ ኑሮዬን እቀይራለሁ ብቻ እንዲል አድርጎታል ይሄ ከባድ ስህተት ነው አሁን ግን ውጪ ወጥቶ የመጫወት ትልቅ ህልም አለኝ እንደማሳካው ተስፋ አለኝ በርግጥ መንገዱ እስኪከፈት ሊያታግል ይችላል ያም ቢሆን አሁን ግን የተሻለ ነው
ሊግ:- የአውሮፓ ዋንጫ አየህ..? የማንስ ደጋፊ ነህ..?
አብዱልከሪም:- የአውሮፓ ዋንጫውን በደንብ ነው ያየሁት..ሲጀመር የፈረንሳይ ነበርኩ በኋላ ላይ ስፔኖች አሳመኑኝ ድሉም ይገባቸዋል..
ሊግ:- የስፔን አጨዋወት ተመቸህ..?
አብዱልከሪም:- የሚጫወቱበት መንገድ ማራኪና አስደሳች ስለነበረ ነው የደገፍኳቸው እኔ የምወደውን አይነት ጨዋታ ስላሳዩኝ ነው ፈረንሳይን ያስቀየሩኝ ጥሩ ነበሩ ድሉ ይገባቸዋል… በውድድሩ ያልጠበኩት የቱርክ ብሄራዊ ቡድንን ነው እነሱም ተመችተውኛል …
ሊግ:- የትኞቹ ተጨዋቾች ተመቹህ ..?
አብዱልከሪም:- ያሚን ላማልና ኒኮ ዊሊያምስ ከስፔን እንዲሀም አርዳ ጉላር ከቱርክ ወድጃቸዋለሁ
ሊግ:- ጨረስኩ …ለቃለምልልሱ አመሰግናለሁ…
አብዱልከሪም:- እኔም በጣም አመሰግናለሁ…
