በሰፈር ውስጥ ሲጫወት ተከላካይ ነበር፡፡ በአንድ አጋጣሚ በረኛቸው ሲቀር የቁመቱን መርዘም የተመለከቱት ጓደኞቹ ከተከላካይነት ወደ በረኝነት (ግብ ጠባቂነት) እንደመጣ ይናገራል- የዛሬው እንግዳችን ፋሪስ ሃላዊ፡፡
ጥያቄ፡– ውልደት እና እድገት የት አካባቢ ነው?
መልስ፡– ተወልጄ ያደኩት ጉራጌ ዞን ወልቂጤ ከተማ ጉመራ ክፍለ ከተማ ነው፡፡ ውልደቴ ጉራጌ ቢሆንም ኳስን ግን የጀመርኩት ኳስ ሜዳ ነው፡፡
ጥያቄ፡– የአንተ ምርጡ በረኛ ማን ነው?
መልስ፡– ሁሉም በረኞች የራሳቸው አቅም ስላላቸው ለእኔ ሁሉም ምርጦች ናቸው፡፡
ጥያቄ፡– የመጀመሪያ ክለብ ማን ነው?
መልስ፡– የመጀመሪያ ክለቤ ከተስፋ ቡድን እስከ ዋናው ቡድን የተጫወትኩበት ኢትዮጵያ ንግድ ባንክ ነው፡፡
ጥያቄ፡– አሁን ከመውረድ ተርፋችኋል፡፡ ከወልቂቴ ጋር ምን ታስባለህ?
መልስ፡– ከመውረድ በመትረፋችን ፈጣሪን አመሰግናለሁ፡፡ የቀረችንን አንድ ዓመት በማሸነፍ ነጥብ ይዘን ለመውጣት ነው የማስበው፡፡ አጀማመራችን ቢያስጠላም ፍፃሜያችንን አሳምረን ለመጨረስ ጥረት እናደርጋለን፡፡
ጥያቄ፡– ወደ ሌሎች ክለቦች ለማምራት እያሰብክ ነው የሚባለው ነገር እውነት ነው ወይ?
መልስ፡– ወልቂጤ ከነማ የምወደው ክለቤ ነው የተወለድኩበትም ነው፡፡ ሁለት ዓመት ሙሉ ላለመውረድ ነው ተጫወትነው፡፡ ብዙ ችግሮችም አሳልፈናል፡፡ ብዙ ውጣ ውረዶችን አይተናል፡፡ እነዚህ ችግሮች ተስተካክለው ከወልቂጤ ጋር ብቀጥል በጣም ደስ ይለኘ ነበር፡፡ ግን የቤተሰብ አስተዳዳሪ ነኝ ልጅ አለኝ፡፡ ብዙ ወጪዎች አሉብኝ፡፡ እነዚህን ቀዳዳዎች ለመሙላት የግድ ገንዘብ ያስፈልገኛል፡፡ ስለዚህ ነው እየወደድኩት ከወልቂጤ የምለየው፡፡
ጥያቄ፡– የጠየቁ ክለቦች አሉ?
መልስ፡– ከአምስት በላይ ክለቦች ጠይቀውኛል፡፡ ስማቸውን ባልነግርህም ከነዚህ ውስጥ ግን በአንደኛው ክለብ ማረፌ የማይቀር ይመስለኛል፡፡
ጥያቄ፡– የወደፊት ሕልምክን ንገረኝ?
መልስ፡– ወጣት እንደመሆኔ አንፃር ሀገሬን በደንብ ማገልገል እፈልጋለሁ፡፡ በተጨማሪም ከሀገር ውጪ የተጫወተው ብቸኛው ግብ ጠባቂ ለመባል አልማለሁ፡፡
ጥያቄ፡– የሚቆጭ ነገር አለ?
መልስ፡– የልጅነት ክለቤ ኢትዮጵያ ንግድ ባንክ ሁለት ዓመት በተስፋ አንድ ዓመት በዋናው ቡድን አሳልፌያለሁ፡፡ እኔ ወደ ዋናው በድን ባደኩበት ዓመት መውረዱ በጣም ይቆጨኛል፡፡
ጥያቄ፡– ከፋሪስ በቀጣይ ዓመት ምን እንጠብቅ?
መልስ፡– የሚጎሉኝን ነገሮች አስተካክዬ ያሉኝን ጥሩ ኳሊቲዎቼን አሳድጌ የተሻለውን ፋሪስ ጠብቁ፡፡
ጥያቄ፡– ወጣት ቡድን ብሄራዊ ቡድን ምርጫ ውስጥ የለህበትም፡፡ ምክንያቱ ምንድነው ትላለህ?
መልስ፡– የምጠራበት ጊዜ እሩቅ አይሆንም፡፡ የሚጎሉኝን ነገሮች በማስተካከል እጠራለሁ ብዬ አስባለሁ፡፡ በደንብ ከስራ ደግሞ አይቀርም፡፡ እኔም ሀገሬን የማገለግልበት ጊዜ ይመጣል፡፡
ጥያቄ፡– በተደጋጋሚ ላለመውረድ መጫወታቹ ችሎታህ ላይ ተፅዕኖ ያሳደረብክ ይመስልሀል?
መልስ፡– እውነት ለመናገር ሜዳ ውስጥ ሆነ ብዙ ነገር ስምታስብ ተፅዕኖ በደንብ ይኖረዋል፡፡ በእዛ ላይ ተከፈለኝ አልተከፈለኝ እየልክ ሜዳ ውስጥ ስትገባ ችሎታክ ላይ ተፅዕኖ መፍጠሩ የማይካድ ሀቅ ነው፡፡
ጥያቄ፡– አንበርቾን አሸንፋቹ በመትረፋቹ ምን ተሰማህ?
መልስ፡– አንበርቾን አሸንፈን በመትረፋችን እጅግ በጣም ደስ ብሎኛል፡፡ እኔን የሚያሳዝነኝ የወልቂጤ ደጋፊዎች ናቸው፡፡ በረደን፣ ሞቀን፣ ደከመን ሰለቸን ሳይሉ ከሀገር ሀገር እያቋረጡ ለሚደግፉን ደጋፊዎች ከመውረድ የተረፍንበትን ጨዋት ለእነሱ ይሁንልኝ፡፡
ጥያቄ፡– ያልተከፈለ የ3 ወር ደሞዝ አለ፡፡ የዚህ ክፍያ መጨረሻው ምን ይሆን?
መልስ፡– ያልተከፈለኝ የ3 ወር ብቻ ሳይሆን የ8 ወር ደሞዝ አልተከፈለኝም፡፡ እንደ አካባቢው ተወልጅነቴ እስካሁን በትዕግስት እየጠበኩ ነው፡፡ የለፋሁበት ላቤ ስለሆነ ይከፈለኛል ብዬ እየጠበኩ ነው፡፡ ቤተሰቤን የማስተዳድረው እኔ ከፍቼ በማገኘው ደሞዝ ስለሆነ ይህንን ግምት ውስጥ በማስገባት ይከፍሉኛል ብዬ አስባለሁ፡፡
ጥያቄ፡– እስካሁን ካደረከው ጨዋታ የማትረሳውየቱን ነው? ለምን?
መልስ፡– እስከዛሬ ካደረኩት ጨዋታ ለእኔ የማልረሳው ከመውረድ የተረፍንበትን የአንበርቾን ጨዋታ ነው፡፡ ምክንያቱም ሁሉም ጓደኞቼ የአሰልጣኞተ አባላት እንዲሁም ደጋፊዎች ጭንቅ ላይ ስለነበርን አሸንፈን በመትረፋችን ይህን ጨዋታ መቼም አልረሳውም፡፡
ጥያቄ፡– ኳስ ተጨዋች ባትሆን ምን ትሆን ነበር?
መልስ፡– ጉራጌ መሆኔን አትዘንጋ፤ ከጥታ ወደ ንግድ ነበር የማመራው፡፡
ጥያቄ፡– በተደጋጋሚ ነጥብ በመጣላቹ ጭንቅ ውስጥ መግባታችሁ እሙን ነው፡፡ ለዚህ ተጠያቂ ማን ነው ትላለህ?
መልስ፡– በተደጋጋሚ ነጥብ ለመጣላችን በሜዳ ውስጥ ብቻ ሳይሆን ከሜዳ ውጪም ያለው ንገር ነው ነጥብ እንድንጥል ያረገን እንጂ እንደ ነበረን ስብስብ እዚህ ጭንቅ ውስጥ አንገባም ነበር፡፡ ክለቡ ላይ የነበረው የፋይናንስ ችግር ነጥብ ለመጣላችን ዋናው ምክንያት ነው፡፡ አንድ ተጨዋች ከ8 ወር እስከ 5 ወር ደሞዝ ሳይከፈለው ውጤት መጠበቅ ከባድ ነበር፡፡ ስለዚህ ለቀጠርከው ኳስ ተጨዋች በአግባቡ ደሞዝ ቢከፈለን ኖሮ እዚህ ጭንቅ ውስጥ አንገባም ነበር፡፡
ጥያቄ፡– እኔ ጨረሻለሁ፡፡ በዚህ አጋጣሚ ማመስገን የምትፈልገው ካለ?
መልስ፡– በመጀመሪያ አላህን አመሰግናለሁ፡፡ እዚህ ደረጃ እንድደርስ ስላደረገኝ በመቀጠል ቤተሰቦቼን እናቴን አባቴን ባለቤቴን ልጄን እንዲሁም የአሰለጠኙኝን አሰልጣኞች በአጠቃላይ በተደጋጋሚ የመሰለፍ እድል የሰጠኝን ሙሉጌታ ምህረትን እንዲሁም ወንድሞቼን እህቴን በተለይ ወንድምም ጓደኛም የሆነው ሪያድ ከድር በሁሉ ነገሬ ላይ ቀድሞ በመገኘት የሚያስፈልገኝን ነገር በማሟላት አይዞ በማለት ስለሚያበረታታኝ ለሪያድ ከድር ድጋሚ ማመስገን እፈልጋለሁ፡፡ አንተንም አመሰግናለሁ፡፡
